ნინა მამუკაძე-ქართულ-იტალიური მედიამაუწყებლის ERMES TV -ის დამფუძნებელი

ERMES-TV1600x900

სულ ცოტახნის წინ როგორც იცით ERMES TV-სა (იტალია) და “გზამკვლევს”  შორის, ურთიერთთანამშრომლობის შეთანხმება გაფორმდა.

ნინა მამუკაძე – ქართველი ჟურნალისტი იტალიაში და ქართულ-იტალიური მედიამაუწყებლის ERMES TV – “ერმესი მედიას” დამფუძნებელია.

გვინდა უფრო ახლოს გაგაცნოთ ნინა მამუკაძე თავისი ისტორიით და თავისი მიღწევებით.

თითოეული ადამიანი საზღვარგარეთ, საკუთარი სამშობლოს სარკე და ელჩია. ქართველ ემიგრანტებს ერთგვარი მისია და პასუხისმგებლობა გვაკისრია, რათა ჩვენი ქვეყნის ისეთი წარმომადგენლები ვიყოთ და ჩვენი სამშობლო ისე წარმოვადგინოთ, როგორც ამას საქართველო იმსახურებს.

ნინა მამუკაძე-განათლებით, პროფესიით და სამუშაო გამოცდილებით ჟურნალისტია. უკვე 13 წელია ემიგრაციაში, იტალიაში იმყოფება, მაგრამ მთელი ამ პერიოდის განმავლობაში, კავშირი არასდროს გაუწყვეტია საკუთარ პროფესიასთან, თუმცა გარკვეული ეტაპის შემდეგ მივიდა დასკვნამდე რომ დადგა დრო, როდესაც თავად უნდა აეღო სადავეები ხელში. ERMES•TV – “ერმესი მედია”, ოფიციალურად 2023 წლის აგვისტოში დაფუძნდა, ხოლო პირველი ინფორმაცია მაუწყებლის პორტალზე ნოემბრის თვეში განთავსდა.

ERMES•TV – “ერმესი მედია” არის ქართულ-იტალიური ციფრული მედიამაუწყებელი, რომელიც საკუთარ მკითხველსა და მაყურებელს სთავაზობს ობიექტურ, ორიგინალ და საინტერესო ჟურნალისტურ პროდუქტს. მისი მიზანია, მიმდინარე მოვლენების ობიექტურად გაშუქება, საქართველოს პოპულარიზაცია იტალიასა და მსოფლიოს სხვადასხვა ქვეყნებში, საზღვრებს გარეთ არსებული ქართული დიასპორების გაერთიანება, ქართველ ემიგრანტთა (განსაკუთრებით იტალიაში) ინფორმირებულობა მიმღებ ქვეყნებში არსებული რეალობისა და კანონმდებლობის შესახებ, პრობლემების ზედაპირზე ამოტანა და წარმატებული ემიგრანტების ფართო საზოგადოებისთვის გაცნობა, ისევ და ისევ ქართველი ხალხისა და საქართველოს საკეთილდღეოდ.

“ერმესი მედია” მოიცავს ოფიციალურ პლატფორმას, ფეისბუკის ოფიციალურ ფეიჯს, იუთუბ არხს და აქვს ასევე საემიგრაციო ჯგუფების მხარდაჭერა სოციალურ ქსელებში. ამგვარად, აქვს წვდომა ძალიან დიდ აუდიტორიაზე.

ნინა მამუკაძის საავტორო გადაცემაა “LA PIAZZA”

ამ გადაცემაში ის გაგაცნობთ იმ ადამიანებს, რომლებმაც უცხო ქვეყანაშიც შეძლეს საკუთარი პროფესიით თვითრეალიზება. აქ მოისმენთ საინტერესო ისტორიებს უცხოეთში მცხოვრებ ქართველებზე და საქართველოს მეგობარ უცხოელებზე, რომელთათვისაც ჩვენი ქვეყანა, ცხოვრების განუყოფელი და უძვირფასესი ნაწილი გამხდარა. თუ თქვენი სურვილი იქნება და საჭირო გახდება, სადაც არ უნდა იმყოფებოდეთ, ჩვენ თქვენამდე აუცილებლად მოვალთ. ეს თქვენი “პიაცა” იქნება.

მალე  ERMES TV  შემოგვთავაზებს ახალ გადაცემას – “PRESSგიდი”

ERMES TV იწყებს “ფეისბუკ”- ჩართვების ციკლს სახელწოდებით PRESSგიდი ნინა მამუკაძესთან ერთად, სადაც მოიწვევენ კომპეტენტურ სტუმრებს თემატიკიდან გამომდინარე და მაყურებელს მისთვის უმნიშვნელოვანეს თემებზე მისცემენ ინფორმაციას და რჩევებს. მათ ექნებათ ავტომატურ რეჟიმში კითხვების დასმისა და ინტერაქციის შესაძლებლობა.

როგორია ნინას თვალით დანახული ჟურნალისტიკა საქართველოში და ემიგრაციაში…

ამ საკითხთან დაკავშირებით , ნინამ ჩვენთან საუბარში აღნიშნა, რომ ის თითქმის 20 წელია ამ სფეროშია. 2005 წელს დაამთავრა ჟურნალისტიკის ფაკულტეტი და დაიწყო ახალგაზრდულ ჟურნალში მუშაობა, მიუხედავად იმისა, რომ ძალიან დიდხანს პრესის ჟურნალისტს მიზერული ანაზღაურება ქონდა, წამითაც არ უფიქრია ამ საქმისთვის თავის დანებება. გამომცემლობა „სამშობლოს“ ნახევრად დანგრეული შენობიდან სულ მალე მოხვდა  ჰოლდინგ „პალიტრა მედიაში“, სადაც შეიძინა  ძალიან დიდი გამოცდილება, რადგან ჰოლდინგის სპეციფიკიდან გამომდინარე, სხვადასხვა ჟურნალ-გაზეთთან თანამშრომლობა და განსხვავებულ თემებზე მუშაობა მოუწია,რაც ემიგრაციაში ჟურნალისტიკის „კეთებაში“ ძალიან გამოადგა.

მისი თქმით მათ აქ არ აქვთ  ფუფუნება, თითო რუბრიკაზე თითო ჟურნალისტი ყავდეთ  მიმაგრებული.მუშაობენ  ყველა თემაზე,რაც საქართველოს პოპულარიზაციისა და ემიგრანტებისთვის საჭირო, საინტერესო და მნიშვნელოვანი იქნება.

და ბოლოს ჩვენი კითხვა იყო სიმბოლური  თუ აპირებს ის საქართველოში დაბრუნებას ….

-“მიჭირს თქმა, რა იქნება წლების შემდეგ. მაგრამ ემიგრაციამ იმდენად გამიმძაფრა ეროვნული იდენტობის განცდა, გაცნობიერებულად, თუ უნებლიეთ, ჩემი ყოველი ნაბიჯი იმდენად უკავშირდება და უახლოვდება ჩემს სამშობლოს, რომ უკვე მნიშვნელობა აღარ აქვს, ფიზიკურად სად ვიქნები. მიუხედავად იმისა, რომ იტალიის მოქალაქეობაც მაქვს ქართულთან ერთად, მაინც თხემით ტერფამდე ქართველი ვარ, ქართულად მიყვარს და ქართულად ვბრაზდები, ქართულად ვეფერები და ყოველთვის ვიქნები ქართველების, საქართველოს სამსახურში”- გვიპასუხა მან.

“გზამკვლევი” ბევრ წარმატებას უსურვებს ნინას და ERMES•TV-ის.

 

 

გაზიარება
გაგზავნა

სრული ფუნქციონალის გამოსაყენებლად გთხოვთ გაიაროთ ავტორიზაცია