ემიგრანტების რაოდენობა – ბოლო ათ წელში ემიგრანტების რაოდენობა რეკორდულად გაიზარდა.

სტატისტიკის ეროვნული სამსახური ემიგრანტად მიიჩნევს საქათველოს იმ მოქალაქეებს, რომლებმაც ქვეყანა დატოვეს და ბოლო 12 თვის განმავლობაში სულ მცირე 183 დღით (შესაძლებელია ეს იყოს რამდენიმე გასვლის ჯამი) სხვა სახელმწიფოს ტერიტორიაზე იმყოფებოდნენ.

რეალური მიგრაციული ვითარების გასაგებად მნიშვნელოვანია მიგრაციული სალდოს დანახვა, ანუ სხვაობისა იმიგრანტებსა და ემიგრანტებს შორის.

2020 წელს თუ არ ჩავთვლით, როცა პანდემიის გამო ქართველი ემიგრანტები დაბრუნდნენ, ქვეყანას ყოველთვის უარყოფითი მიგრაციული სალდო ჰქონდა, ანუ უფრო მეტი ადამიანი მიდიოდა უცხოეთში, ვიდრე სამშობლოში ბრუნდებოდა. ასევე გამონაკლისი იყო 2022 წელიც, როცა საქართველოში რუსი მიგრანტები შემოვიდნენ.

შარშან საქართველოს 163 480 მოქალაქე გავიდა ქვეყნიდან, ხოლო 91 896 შემოვიდა. ეს ნიშნავს, რომ 2023 წელს 71 584 ათასით მეტმა ქართველმა დატოვა ქვეყანა, ვიდრე დაბრუნდა.

ემიგრაციაში წასული საქართველოს მოქალაქიდან 70% (114 438) 30 წლამდე ასაკისაა, მათ შორის 43% (70,003) 15 წლამდე ბავშვია.

უცხოეთში სამუშაოდ წასული საქართველოს მოქალაქეები სამშობლოში დარჩენილ ოჯახებს ინახავენ. წლიდან წლამდე იზრდება აქ გამოგზავნილი თანხა და, შესაბამისად, მათი წვლილი ეკონომიკაში. შარშან ემიგრანტებმა 4.1 მილიარდ დოლარზე მეტი გადმორიცხეს, აქედან თითქმის 1.3 მილიარდი დოლარი – ევროკავშირის ქვეყნებიდან.

სტატისტიკის ეროვნული სამსახურის ინფორმაციით, 2024 წლის პირველი იანვრის მდგომარეობით, საქართველოს მოსახლეობის რიცხოვნობამ 3.7 მილიონი შეადგინა, რაც წინა წლის შესაბამისი პერიოდის მაჩვენებელთან შედარებით 1.1%-ით ნაკლებია.