5 ნოემბრის საპრეზიდენტო არჩევნებამდე არც თუ ისე დიდი დრო დარჩა. თუმცა სანამ თეთრ სახლს ახალი ბინადარი ეყოლება, საკმაო დრო გაივლის, ანუ ინაუგურაციამდე ბევრი მოვლენაა მოსალოდნელი. ბოლო გამოკითხვებით, ტრამპისა და კამალა ჰარისისი რეიტინგები თითქმის ერთნაირია, სიტუაცია, სავარაუდოდ, სექტემბრის დასაწყისში შეიძლება, შეიცვალოს, როცა რამდენიმე ტელეკომპანიის ეთერში ტრამპისა და ჰარისის დებატები გაიმართება. ტრამპის პოლიტიკა ემიგრანტების მიმართ საყოველთაოდ ცნობილია. ის მკაცრ შეზღუდვებს აანონსებს და პრეზიდენტობის დროს კიდეც გამოიჩინა ამ მხრივ თავი. აი, რაც შეეხება მკაცრი იმიჯის მქონე ყოფილ პროკურორ კამალა ჰარისს, ის თავად ემიგრანტების შვილია და სავარაუდოდ, არა მხოლოდ გააგრძელებს ბაიდენის ლიბერალურ პოლიტიკას, არამედ შესაძლოა, გააუმჯობესოს კიდეც ემიგრანტების სამართლებრივი მდგომარეობა.

ამერიკა ზოგადად ემიგრანტების და სესაძლებლობების ქვეყანაა და ბევრი ადამიანი ცდილობს, იქ ლეგალურად მოხვდეს და დასაქმდეს. ემის საშუალებას კი, უამრავი სტიპენდიის, ოფიციალური მიწვევისა და სხვა გზების გარდა, მწვანე ბარათი წარმოადგენს. ამ დღეებში აშშ-ის შიდა უსაფრთხოების სამსახური სტატისტიკა გამოქვეყნდა, რომლის თანახმად, 2022 წელს მწვანე ბარათი ჯამში 1.018 მილიონზე მეტმა ადამიანმა მიიღო. მონაცემებს Visualcapitalist აქვეყნებს.

ამავე პერიოდში ჯამში საქართველოს 2 303-მა მოქალაქემ მიიღო მწვანე ბარათი, რითაც რეიტინგში 67-ე ადგილი დაიკავა. აღსანიშნავია ისიც, რომ რეგიონში ყველაზე დიდი რაოდენობით მწვანე ბარათის თურქეთის მოქალაქეებზე გაიცა და 7 001 შეადგინა, რითაც რეიტინგში 30-ე ადგილი დაიკავა.

2022 წელს საქართველოს მოქალაქეებზე მეტი მწვანე ბარათი სომხეთის მოქალაქეებმა მიიღეს. სომხეთი რეიტინგში 3 037 მწვანე ბარათით 57-ე ადგილზეა. რაც შეეხება აზერბაიჯანს, ის 94-ე ადგილს იკავებს 1 129 მწვანე ბარათით.

საანგარიშო პერიოდში უკრაინა-რუსეთის ომის პირველი წელი მიმდინარეობდა. ამ პერიოდში უკრაინის 11 621-მა მოქალაქემ მიიღო მწვანე ბარათი (21-ე ადგილი). რუსეთის მოქალაქეებზე კი 8 906 ბარათი (27-ე ადგილი) გაიცა.

ამასთანავე, 2022 წელს ყველაზე დიდი რაოდენობით მწვანე ბარათი მექსიკის მოქალაქეებმა მიიღეს, მეორე და მესამე ადგილებს კი ინდოეთი და ჩინეთი ინაწილებენ. უფრო კონკრეტულად, TOP-10 ქვეყანა მწვანე ბარათების რაოდენობით ასე გამოყურება:

• მექსიკა – 138 772;
• ინდოეთი – 127 012;
• ჩინეთი – 67 950;
• დომინიკის რესპუბლიკა – 40 152;
• კუბა – 36 642;
• ფილიპინები – 35 998;
• ელ სალვადორი – 30 876;
• ვიეტნამი – 24 425;
• ბრაზილია – 24 169;
• კოლუმბია – 21 723.

ცნობისთვის, მწვანე ბარათი აშშ-ის საემიგრაციო სტატუსის დამადასტურებელი ბარათის არაფორმალური სახელია. ბარათი მფლობელს უფლებას აძლევს, ლეგალურად იცხოვროს და იმუშაოს ამერიკის შეერთებულ შტატებში, ისარგებლოს სახელმწიფო სამედიცინო დაზღვევით, მიიღოს კრედიტი შეღავათიანი პირობებით და ჰქონდეს აშშ-ს სოციალური დაზღვევის ნომერი.

ავტორი: მარიამ გამთენაძე